Justerjûn hat yn de gemeenterie in tumultueuze gearkomste plakfûn nei oanlieding fan it manifest en de needgjalp fan ús ynwenners út de Súdeasthoeke. De diskusje wie fûl en de emoasjes leine heech, mar Heerenveen Lokaal/GBH hat him mei folle ynset ynset om de stim fan ús ynwenners streekrjocht yn de rie te bringen. En mei sukses: de moasje is úteinlik unanym oannommen.
As fraksjefoarsitter fan Heerenveen Lokaal ha ik mei klam pleite foar de soargen en wanhoop fan ús ynwenners. Ut de yntsjinne stikken en de protte reaksjes docht dúdlik bliken dat de situaasje mei de wolf ûnhâldber is. Ynwenners fiele har ûnfeilich, harren fee wurdt oanfallen en de bedriging nimt allinnich mar ta. Dit kin en mei net langer sa trochgean.
Tidens de gearkomste waard al gau dúdlik dat net alle partijen deselde urginsje fielden. De helte fan de rie woe it manifest earst yn de jiskefet smite. Heerenveen Lokaal hat lykwols fûl fochten om foar te kommen dat de stim fan ús ynwenners ferlern gean soe. Nei yntinsyf oerlis, ek mei de opstellers fan it manifest, is de moasje ljocht wizige, mar de essinsje is oerein bleaun: de needgjalp fan de ynwenners wurdt trochstjoerd nei de provinsje en de Twadde Keamer.
De gemeenterie hat him, nei in lange en fûle diskusje, úteinlik unanym efter de moasje en it manifest skare. Dit is in wichtige oerwinning en in earste stap yn de goede rjochting. Mar hjirmei hâldt it net op. Wy bliuwe druk útoefenjen om derfoar te soargjen dat der op koarte termyn maatregels nommen wurde tsjin it wolveprobleem yn de Súdeasthoeke.
De gemeente is ferantwurdlik foar de feilichheid fan minsk en dier binnen har grinzen. It is skandalich en dom dat Brussel ús op it stuit tsjinhâldt om yn te gripen. Dit kin en mei net sa bliuwe. Binnenkoart sil it wolvedebat yn de Twadde Keamer plakfine, en dêr sil it manifest fan ús ynwenners in rol krije.
Heerenveen Lokaal/GBH begrypt de eangst, lilkens, it fertriet en de machtleazens fan ús ynwenners en sil him hjir ûnfermindere foar ynsette. Dit probleem is noch lang net oplost. Persoanlik ûnderfyn ik, as ynwenner fan Jobbegea, alle dagen de grutte ynfloed fan de wolf op ús mienskip. Wy sille net rêste oant wy as gemeente sels optrede meie om ús ynwenners en harren bisten te beskermjen tsjin dizze bedriging.
Dizze unanyme goedkarring is in stap foarút, mar wy binne der noch net. Wy bliuwe fjochtsjen oant der konkrete oplossingen komme.
Heerenveen Lokaal/GBH
